من وحي شم النسيم

في جنينة المنتزه :
زجلية
=====
يا منتزه يا جامع الأحباب , في يوم جميل
الربيع بيفرش خضرته ,جاي لنا من أحلى نيل
نيل المحروسة مصر اللي شعبها شعب أصيل
زهوره متشكلة من كل لون يشرح القلب العليل
وعندليب وعصافير تزغرد فوق غصن أخضر يميل
والشمس طاله علينا والبحر مكسي بشعر أصفر طويل
تعالوا شموا عندنا أجمل نسيم من الصبح حتى الأصيل
وانسوا همومكم وافرحوا الهم ان ما اتنسي يبقى تقيل
وافرشوا الأرض وجهزوا الفسيخ والبصل في ظل ظليل
وشوفوا الناس حواليكم بتضحك ضحكة عذبة سلسبيل
قالوا لأعمالهم ولبيوتهم اليوم اجازة خلونا منكم نستقيل
=======
أطفال بتلعب كورة وعماله تجري فرحانه
والبيض ملون في ايديهم والشمس سلطانه
والأهل منهم بيقزقز لب , واللي بيغني زي فنانه
فينك يا زمان لما كنا نشتري حمص وملانه
جينا نجدد حياتنا , واولادنا قالوا العبوا معانا
وبلاش ( دنشنه) اللي بيوتنا منها مليانه
( فسوا ) دماغكم يوم , وخلوا ودانكم سمعانا
( طنش ) يابابا , وانت ياماما ( كبرى )
واوعي تقولي اليوم آه يا تعبانه
=======
بنات عرايس لابسة ربيعي بتنط الحبل وتهيص
بتشم عطر الورود في الجنينه قبل ما تفيص
ويملاها ريحة البصل والفسيخ بعد ما اتمصمص
والناس بجهل رموه على الخضرة وله مكان متخصص
شفت واحد قاعد عمال بيصرخ آه بطني بتمغص
لاقام يصلي ولا اتمشى والأكل في كرشه مترصص
وده راجل مسترخي بيقرأ في جرايده ويبصبص
أرجوكم عيب كده !! دا عدونا بينا متربص
شم النسيم عيدفرعوني فيه عادات غريبة اتفحص
أما الربيع أيام من عمرنا حلوة أوعى تفكر انها تخلص .
========
__________________